19 / 01 / 2011, 14 : 02 AM
|
#254
|
|
الإدارة
تاريخ التسجيل: 12 / 03 / 2010
الدولة: فِلِسطيـــني
المشاركات: 19,012
معدل تقييم المستوى: 20
|
اليوم أول مرة أفكر أكتب رأيي بفيلم شفته ..
وان شاء الله اكون واضحة برأيي ومفيدة ..
مبارح شفت فيلم
..Jhoom Barabar Jhoom
الي لفتني وشدني اني أحمله انو الأبطال بحبهم خصوصاً مستر طوالان "آبهيشيك باتشان " وكمان بوبي ديول والجميلة بريتي زينتا
بالاضافة كان نفسي أشوف فيلم للارا دوتا وهي من الأبطال فيه ...
القصة مو سيئة
بريتي وآبهشيك بيلتقيوا صدفة بمحطة القطار .. بيكون الجو بينهم بالبداية مو حلو وبريتي بتعتقد انو آبهشيك بيحاول انو يخلق أي فرصة منشان يعاكسها
ويتكلم معها فمنشان تقفل عليه الباب حكت اله أنا مخطوبة وبستنى خطيبي بالقطار .. وهو طلع كمان نفس الشي بيستنى خطيبته بالقطار نفسه ..
وهالبداية بالحديث أدت انو كل واحد فيهم يحكي عن قصة التقاؤه بالخطيب او الخطيبة .. وفعلا تم هالشي .. وبعد الانتهاء من سرد قصة كل واحد فيهم للتاني بينتبهوا انو القطار وصل وهم ما انتبهوا بس بيعرفوا لاحقاً انه الي وصل قطار من منطقة تانية غير الي جاي من برمينغهام - المنطقة الي فيها خطيبة آبهشيك وخطيب بريتي - وهالشي بيعطيهم فرصة لقضاء ساعة من الزمن للمرة التانية مع بعض لحد ما يوصل القطار ..
شو بيسير بعدها هل بيفترقوا تماما؟ ولا بتجمعهم ظروف معينة؟ .. راح تعرفوا لو تابعتوا الفيلم أكيد .. وأنا ما بحب حدا يحرق علي أي فيلم فما حعمل هالشي أنا أبداً ..
هلأ أداء أبشيك - وبكل حيادية من دون تحكم مشاعري كوني بحب هالممثل كتير.png "(3)") - كان حلو كتير وفي نوع من الكوميديا اللطيفة .. مع انو اللوك تبعه بالفيلم ما عجبني كتير .. وأحلى شي لمن كل شوية يحكي لبريتي "أنا رجل محترم" كونها بتظن انه بيعاكس فيها وبيحكي معها لغرض سيء ..
شخصيته عجبتني بالفيلم ولو انو المظهر مو كتير ..
بريتي طبعا ناعمة وجدا كيوت مظهرها وتمثيلها كمان حلو .. ودورها الي اجت فيه كمان حلو ..
بوبي ديول لعب دور خطيب بريتي بحكايتها الي حكتها لأبهشيك .. دوره مش بطال بس ما حبيت ردة فعله على موضوع معين بنهاية الفيلم حسيت انو شي مستحيل يكون موجود ومافي هيك وفيه مبالغة بالموضوع .. طبعاً ما راح أحكي عن شو هو هالشي منشان ما أحرق الفيلم خخخخخخخ ..
لارا دوتا جميلة بس بالنسبة الي ما تقبلتها كتير بالفيلم وهي لعبت دور خطيبة أبهشيك حسب حكايته الي حكاها لبريتي في محطة القطار ..
مابعرف ما حسيتها وصلت الي مشاعر الدور الي لعبته طول الفيلم ..
في شي انا استغربت عليه بالفيلم .. بريتي جاية انها من اصول باكستانية واسمها "الفيرا خان" واحنا عارفين عائلة خان يعني مسلمة .. بس تفاجأت انو
وهي بتروي قصتها لآبشيك انها كانت تتمنى امنية دايماً جابوا انها بتروح للكنيسة وبتصلي فيها وبتطلب من ربنا يعطيها الي بتتمناه .. بالاضافة بالغرفة الخاصة فيها كان في عبارة معلقة على الجدار " هذا من فضل ربي" بصراحة عملولي تشويش بهالنقطة  .. ما عرفت شو هي مسلمة أو مسيحية ..!!!
الفيلم كقصة حلو ومسلي للمتابعة لمرة وحدة بس مو أكتر ..لتمضية الوقت ..
في ظهور خاص لأميتابجي كمغني بيعلق على مواقف معينة بشكل أغنية يعني شي ترفيهي بالنسبة الي كان أكتر من أي شي تاني ..
الأغاني ما حبيتها بصراحة ولا أغنية .. عادية جداً ما استهوتني كتير ..
أماكن التصوير حلوة .. مو سيئة ..
تقييمي للفيلم بالنهاية
5/10 ..
حكيت كتير صح ..ههههه..
وان شاء الله ارجعلكم بفيلم تاني أحلى من هالفيلم المرة الجاية ..
التعديل الأخير تم بواسطة القدس عربية ; 19 / 01 / 2011 الساعة 24 : 03 AM
|
|
|